ദിവ്യബലിയര്‍പ്പിക്കുന്നതിനിടെ കൊല്ലപ്പെട്ട ഫ്രാന്‍സിലെ ഫാ. ഷാക് ഹാമെലിന്‍റെ പേര് നഗരത്തിലെ ഒരു പൊതു അങ്കണത്തിനു നല്‍കിക്കൊണ്ട് അദ്ദേഹത്തെ ആദരിക്കാന്‍ പാരീസിലെ അധികാരികള്‍ തീരുമാനിച്ചു. ജോണ്‍ പോള്‍ രണ്ടാമന്‍റെ പേരിലുള്ള ഒരു ഇടവക പള്ളിയുടെ മുമ്പില്‍ കിടക്കുന്ന ഈ സ്ഥലത്തിന് ഇതുവരെ ഔദ്യോഗികമായ പേരുകളില്ലായിരുന്നു. സഭാപരമായ സമ്മേളനങ്ങള്‍ക്ക് ഈ സ്ഥലം ഉപയോഗിക്കുക പതിവായിരുന്നു. ഈ ചത്വരത്തിനു ഫാ. ഹാമെലിന്‍റെ പേരു നല്‍കാമെന്ന നിര്‍ദേ ശം ഉയര്‍ന്നു വന്നപ്പോള്‍ ഏകകണ്ഠമായാണ് നഗരത്തിന്‍റെ ഭരണസമിതി തീരുമാനമെടുത്തതെന്നു മേയര്‍ അറിയിച്ചു. കഴിഞ്ഞ വര്‍ഷം ജൂലൈ 26-നാണ് ഫാ. ഹാമെല്‍ കൊല്ലപ്പെട്ടത്. ഫാ. ഹാമെല്‍ ധീരമായ ഈ രക്തസാക്ഷിത്വത്തിലൂടെ തന്നെ വാഴ്ത്തപ്പെട്ടവനായി മാറിയെന്നു അനുശോചനസന്ദേശത്തില്‍ ഫ്രാന്‍സിസ് മാര്‍പാപ്പ അഭിപ്രായപ്പെട്ടിരുന്നു. ഫാ. ഹാമെലിന്‍റെ രക്തസാക്ഷിത്വം ഔദ്യോഗികമായി അംഗീകരിക്കുന്നതിനുള്ള നടപടികള്‍ ആരംഭിച്ചിട്ടുണ്ട്.
