ആനന്ദകരവും സന്തോഷപ്രദവുമായ ജീവിതത്തിനായി ബാല്യം വീണ്ടെടുക്കാന് ബാംഗ്ലൂര് ആര്ച്ചുബിഷപ് ഡോ. പീറ്റര് മച്ചാഡോ ആഹ്വാനം ചെയ്തു. ചിരിക്കാനുള്ള കഴിവ് മനുഷ്യര്ക്കു നഷ്ടമാകുകയാണ്. സ്വാഭാവിക സന്തോഷം അവരില് ഇല്ലാതാകുന്നു. കൃത്രിമ ജീവിതത്തിന് ഉടമകളായി മാറുകയാണു പലരും. ബാല്യവും ശിശുത്വവും നഷ്ടപ്പെടുന്നതാണു കാരണം — ആര്ച്ചുബിഷപ് പറഞ്ഞു. ബാംഗ്ലൂരില് സലേഷ്യന് പ്രൊവിന്ഷ്യല് ഹൗസില് വി. ഡോണ് ബോസ്കോയുടെ തിരുനാളില് മുഖ്യകാര്മ്മികനായി സന്ദേശം നല്കുകയായിരുന്നു അദ്ദേഹം. വി. ഡോണ് ബോസ്കോ ആധുനികലോകത്തിനു മികച്ച ദാനമാണ്. യുവാക്കളുടെ സ്നേഹിതന് എന്ന വിധത്തില് ബാല്യത്തിന്റെ ആനന്ദം പങ്കുവച്ച വ്യക്തിയാണ് അദ്ദേഹം – ആര്ച്ചുബിഷപ് പറഞ്ഞു.
യേശു ശിശുക്കളെ സ്നേഹിച്ചതുപോലെ ഓരോരുത്തരും ശിശുക്കളെപ്പോലെയാകുകയും അവരെ സ്നേഹിക്കുകയും വേണം. ശിശുക്കള് തുറവിയുള്ളവരും ലാളിത്യം നിറഞ്ഞവരും സത്യസന്ധരുമാണ്. സ്വാഭാവിക ശൈലിയാണ് അവരുടേത്, സുതാര്യതയും അവരുടെ പ്രത്യേകതയാണ്. മുതിര്ന്നവര് അവരെ കണ്ടാണു പഠിക്കേണ്ടത് — ആര്ച്ചു ബിഷപ് മച്ചാഡോ വിശദീകരിച്ചു.