നാലു ദശകങ്ങള്ക്കിടയിലെ ഏറ്റവും വലിയ അഗ്നിപര്വത സ്ഫോടനത്തിന്റെ ദുരന്തങ്ങളനുഭവിക്കുന്ന ലാറ്റിനമേരിക്കന് രാജ്യമായ ഗ്വാട്ടിമലയ്ക്കു ഫ്രാന്സിസ് മാര്പാപ്പ ഒരു ലക്ഷം ഡോളറിന്റെ ധനസഹായം നല്കി. ഒരു പ്രാരംഭസഹായമാണിതെന്നും ഗ്വാട്ടിമലയോടു വൈകാരികമായി ചേര്ന്നു നില്ക്കുന്നതിന്റെയും പൈതൃകമായ വാത്സല്യം പ്രകടിപ്പിക്കുന്നതിന്റെയും ഒരു സൂചനയായിട്ടാണ് ഈ സഹായം നല്കുന്നതെന്നും വത്തിക്കാന് അധികാരികള് വ്യക്തമാക്കി. വത്തിക്കാന് സമഗ്രവികസന കാര്യാലയം, ഗ്വാട്ടിമലയില് ദുരന്തം ഏറ്റവുമധികം ബാധിച്ച രൂപതാധികാരികള് വഴിയാണ് ഈ പണം ചിലവഴിക്കുക. വത്തിക്കാന് കൂടാതെ വിവിധ രാജ്യങ്ങളിലെ കത്തോലിക്കാസഭയുടെ സന്നദ്ധസംഘടനകളും സഹായവുമായി ഗ്വാട്ടിമലയിലെത്തുന്നുണ്ട്. സ്ഫോടനത്തില് നൂറിലേറെ പേര് മരിക്കുകയും ഇരുനൂറോളം പേരെ കാണാതാകുകയും ചെയ്തിട്ടുണ്ട്. കാലാവസ്ഥ അനുകൂലമല്ലാത്തതിനാല് കാണാതായവര്ക്കുവേണ്ടിയുള്ള തിരച്ചില് താത്കാലികമായി നിറുത്തിവച്ചിരിക്കുകയാണ്.