കൊച്ചി: നടപടിക്രമങ്ങള് പാലിക്കാതെയും നയവിരുദ്ധമായും ബ്രൂവറികളും ഡിസ്റ്റലറികളും ആരംഭിക്കാനുള്ള നീക്കം സര്ക്കാര് ഉപേക്ഷിച്ചത് ചരിത്രവിജയമായി കാണുന്നുവെന്ന് കേരള മദ്യ വിരുദ്ധ ഏകോപന സമിതി സംസ്ഥാന ചെയര്മാന് ജസ്റ്റീസ് പി.കെ.ഷംസുദ്ദീന്, സംസ്ഥാന ജന. സെക്രട്ടറി അഡ്വ. ചാര്ളി പോള് എന്നിവര് പറഞ്ഞു. ഈ വിജയത്തില് കേരളത്തിലെ പ്രതിപക്ഷത്തിനും മദ്യവിരുദ്ധ പ്രസ്ഥാനങ്ങള്ക്കും അഭിമാനിക്കാം. യാതൊരു ആലോചനയും പഠനവും മുന്നൊരുക്കങ്ങളും കൂടാതെ ബ്രൂവറികളും ഡിസ്റ്റലറികളും ആരംഭിക്കാനുള്ള ഗൂഢനീക്കത്തിന്റെ ഉള്ളറകള് വെളിച്ചത്തുകൊണ്ടുവന്നത് ഇവിടത്തെ മാധ്യമങ്ങളാണ്. മാധ്യമങ്ങള്ക്കും ഈ വിജയത്തില് ഗണ്യമായ പങ്കുവഹിക്കാന് കഴിഞ്ഞു. ഇവ നടപ്പാക്കരുതെന്നാവശ്യപ്പെട്ട് കേരളമദ്യവിരുദ്ധ ഏകോപനസമിതിയും കെ.സി.ബി. സി. മദ്യവിരുദ്ധ സമിതിയും സര്ക്കാരിന് നിവേദനം സമര്പ്പിക്കുകയും കൊച്ചിയില് നില്പ്പുസമരം നടത്തുകയും ചെയ്തിരുന്നു.