നിഷ കുന്നത്തേല്‍, ബല്‍ത്തങ്ങാടി
ജൂണ്‍ 7-ാം തീയതിയിലെ സത്യദീപത്തില്‍ ശ്രീ. ജോയി വടക്കുഞ്ചേരി എഴുതിയ "ശവസംസ്കാര ശുശ്രൂഷയിലെ അനുശോചനസന്ദേശം" എന്ന കത്തു വായിച്ചതിനെ തുടര്‍ന്നാണ് ഈ കത്തെഴുതുന്നത്.
വളരെ നന്ദിയോടും സ്നേഹത്തോടുംകൂടി പറയട്ടെ, ലേഖകന്‍ പറഞ്ഞതുപോലെ ഈയൊരു സാഹചര്യത്തില്‍ നമ്മുടെ സഭയിലെ പല വൈദികരും കാണിക്കുന്ന വിവേകവും പക്വതയും (നാനാജാതി മതസ്ഥര്‍ തിങ്ങിനില്ക്കുന്നിടത്താണു തന്‍റെ പ്രസംഗമെന്ന അവബോധത്തോടെ മരണത്തെക്കുറിച്ചുള്ള ക്രിസ്തീയവിശ്വാസം വളരെ ലളിതമായി പങ്കുവച്ചു കുടുംബാംഗങ്ങള്‍ക്കും ബന്ധുക്കള്‍ക്കും ആശ്വാസവചനങ്ങള്‍ നല്കുന്ന രീതി) എടുത്തുപറയേണ്ടതാണ്. സാഹചര്യമനുസരിച്ചു വിവേകപൂര്‍വം ചിന്തിക്കുകയും പ്രവര്‍ത്തിക്കുകയും ചെയ്യുകയെന്നതാണല്ലോ ഓരോ ക്രൈസ്തവന്‍റെയും കര്‍ത്തവ്യം.
