സിസ്റ്റര്‍ സുജാത മേനാച്ചേരി
ജെറെമിയ 3:15 – എനിക്കിഷ്ടമുള്ള അജപാലകരെ ഞാന്‍ നിങ്ങള്‍ക്കു നല്കും. ഞാന്‍ അജഗണങ്ങള്‍ക്ക് അജപാലകരെ നിയമിക്കും. അവര്‍ അവയെ വിശ്വസ്തയോടെ പാലിക്കും. അജപാലകന്‍ ആ സ്ഥാനം സ്വീകരിക്കുന്നതു ദൈവതൃക്കരങ്ങളില്‍ നിന്നാണ്. അതു ദൈവികദാനമാണ്; സ്വീകര്‍ത്താവിന്‍റെ അവകാശമല്ല.
ഈ അജപാലകരുടെ ലക്ഷണങ്ങള്‍ എന്താണ്? ഈ സന്ന്യസ്തരുടെ തിരിച്ചറിയലിനുള്ള അടയാളമെന്താണ്? കടകളില്‍ കാണുന്ന തുണികള്‍ – മേല്‍ത്തരം – വാങ്ങിച്ചു കയ്യും കഴുത്തും വെട്ടി പോക്കറ്റും പിടിപ്പിച്ചു ചിലര്‍ക്കൊരു ചരടും കുരിശും ചിലര്‍ക്കൊരു സ്റ്റീല്‍ ചെയിനും കുരിശും – നെറ്റിക്കൊരു കുരിശും ബിഷപ്പിനരപ്പട്ടയും. ഇങ്ങനെ ചിലതൊക്കെയാവാം തിരിച്ചറിയലിന്‍റെ അടയാളങ്ങള്‍. ഒരു ഓട്ടോ ഡ്രൈവര്‍ ലൈസന്‍സെടുത്തു കണ്ണും ടെസ്റ്റ് നടത്തി ഒരു കാക്കി ഷര്‍ട്ടുമിട്ടാല്‍ ശരിയായ ഡ്രൈവറാകില്ല. അയാളില്‍ പ്രതിബദ്ധതയുടെ, കരുതലിന്‍റെ ശ്രദ്ധയുടെ, ഉത്തരവാദിത്വത്തിന്‍റെ, ഒരു ഹൃദയമുണ്ടായിരിക്കണം. ഏതു ജീവിതവും പ്രതിബദ്ധതയുടേതാകണം.
