തോമസ് സി.എസ്. ചെരിപുറം, ചെങ്ങളം
ഒരു കത്തുതന്നെ തുടര്‍ച്ചയായ രണ്ടു ലക്കങ്ങളില്‍ (അപ്പം മുറിക്കല്‍ ശുശ്രൂഷ, ലക്കം 32, 33) പ്രസിദ്ധീകരിച്ചു കണ്ടപ്പോള്‍ പ്രതികരിക്കണം എന്നു തോന്നി. ശ്രീ. ആന്‍റണി ജോസഫ് എഴുതുന്നു: "യേശുവിന്‍റെ അന്ത്യഅത്താഴ വേളയെ സ്മരിച്ചുകൊണ്ടു പെസഹാവ്യാഴാഴ്ച സായാഹ്നത്തില്‍ പള്ളിയില്‍ അപ്പം മുറിക്കല്‍ കര്‍മ്മം നടത്തിവരുന്ന നല്ലൊരു പതിവു നമുക്കുണ്ട്." യേശുവിന്‍റെ അന്ത്യ അത്താഴത്തിന്‍റെ അനുസ്മരണം പെസഹാവ്യാഴാഴ്ച സായാഹ്നത്തില്‍ മാത്രമല്ലല്ലോ ആചരിക്കുന്നത്; എല്ലാ ദിവസവും ഉണ്ടല്ലോ – പല ദിവസങ്ങളിലും ഒന്നില്‍ കൂടുതല്‍ തവണ. അപ്പോഴെല്ലാം "എന്‍റെ ഓര്‍മ്മയ്ക്കായി ചെയ്യുവിന്‍" (ലൂക്കാ 22:19) എന്നു ചൊല്ലുന്നുണ്ട്. അതല്ലേ യേശുവിന്‍റെ അന്ത്യഅത്താഴത്തിന്‍റെ അനുസ്മരണ ആചരണം? പക്ഷേ, അതു വീട്ടില്‍ നടത്തുന്നതിനു കര്‍ശനമായ നിയന്ത്രണമുണ്ട്. തന്നെയുമല്ല അഭിഷിക്തരേ അതു ചെയ്യാവൂ. അതുകൊണ്ടു യേശുവിന്‍റെ അന്ത്യഅത്താഴത്തിന്‍റെ സ്മരണയായി വീട്ടില്‍ അപ്പം മുറിക്കാന്‍ സാധാരണ വിശ്വാസിക്ക് അനുവാദമില്ല.
