Latest News
|^| Home -> National -> മാര്‍ ആന്‍റണി കരിയില്‍ മെത്രാപ്പോലീത്തന്‍ വികാരിയായി സ്ഥാനമേറ്റു

മാര്‍ ആന്‍റണി കരിയില്‍ മെത്രാപ്പോലീത്തന്‍ വികാരിയായി സ്ഥാനമേറ്റു

Sathyadeepam

എറണാകുളം-അങ്കമാലി അതിരൂപത മെത്രാപ്പോലീത്തന്‍ വികാരി മാര്‍ ആന്‍റണി കരിയിലില്‍ സ്ഥാനമേറ്റു. എറണാകുളം സെന്‍റ് മേരീസ് കത്തീഡ്രല്‍ ബസിലിക്കയില്‍ കൃതജ്ഞതാബലിയുടെ ആരംഭത്തില്‍ അതിരൂപത ചാന്‍സലര്‍ റവ. ഡോ. ജോസ് പൊള്ളയില്‍ നിയമന പത്രിക വായിച്ചു.

മുഖ്യകാര്‍മികന്‍ ആര്‍ച്ച്ബിഷപ് മാര്‍ ആന്‍റണി കരിയിലിനൊപ്പം ബിഷപ്പുമാരായ മാര്‍ സെബാസ്റ്റ്യന്‍ എടയന്ത്രത്ത്, മാര്‍ ജോസ് പുത്തന്‍ വീട്ടില്‍, മാര്‍ തോമസ് ചക്യത്ത്, മാര്‍ സെബാസ്റ്റ്യന്‍ വാണിയപ്പുരയ്ക്കല്‍, അതിരൂപത സിഞ്ചെല്ലൂസ് റവ. ഡോ. ജോസ് പുതിയേടത്ത്, മോണ്‍സിഞ്ഞോര്‍മാരായ റവ. ഡോ. ആന്‍റണി നരികുളം, റവ. ഡോ. ആന്‍റണി പുന്നശേരി, സിഎംഐ തിരുഹൃദയ പ്രൊവിന്‍സ് പ്രൊവിന്‍ഷ്യല്‍ സുപ്പീരിയര്‍ റവ. ഡോ. ജോസ് കുറിടേയത്ത്, മാണ്ഡ്യ രൂപത അഡ്മിനിസ്ട്രേറ്റര്‍ ഫാ. മാത്യു കോയിക്കര, ചാലില്‍ പള്ളി വികാരി ഫാ. പോള്‍ കാച്ചപ്പിള്ളി എന്നിവര്‍ സഹകാര്‍മികരായി. മേജര്‍ ആര്‍ച്ചുബിഷപ് കര്‍ദി. മാര്‍ ജോര്‍ജ് ആലഞ്ചേരി അനുഗ്രഹ പ്രഭാഷണം നടത്തി. അതിരൂപതയുടെ ഐക്യത്തിനും സമാധാനത്തിനുമായി ഏവരും കൂട്ടായി പ്രവര്‍ത്തിക്കാനും പ്രാര്‍ഥിക്കാനും അദ്ദേഹം ആഹ്വാനം ചെയ്തു.

മാര്‍ കരിയില്‍ സന്ദേശം നല്‍കി. പുതിയ നിയോഗത്തില്‍ എല്ലാവരുടെയും പ്രാര്‍ത്ഥനകളും സഹകരണവും എപ്പോഴും ഉണ്ടാകണമെന്ന് അദ്ദേഹം അനുസ്മരിപ്പിച്ചു. 40 വര്‍ഷമായി അതിരൂപതയെ അറിഞ്ഞും സ്നേഹിച്ചും മുന്നോട്ടുപോകുന്ന തനിക്കു പുതിയ ശുശ്രൂഷയില്‍ വൈദികരുടെയും വിശ്വാസിസമൂഹത്തിന്‍റെയും പിന്തുണയും പ്രോത്സാഹനവുമുണ്ടാകുമെന്നു വിശ്വസിക്കുന്നു. അരൂപതയുടെ പ്രവര്‍ത്തനങ്ങളില്‍ വിവിധ രീതികളില്‍ ഭാഗഭാക്കാകാന്‍ അവസരമുണ്ടായിട്ടുണ്ട്. തന്നേക്കാള്‍ കഴിവും യോഗ്യതയുമുള്ള മെത്രാന്മാര്‍ ഈ നിയോഗത്തിനായി ഉണ്ടായിരുന്നു. എങ്കിലും ദൈവനിയോഗത്തെ പൂര്‍ണ മനസോടെ ഏറ്റെടുക്കുന്നു. നാലു വര്‍ഷം സേവനം ചെയ്ത മാണ്ഡ്യ രൂപത ബിഷപ് എടയന്ത്രത്തിന്‍റെ നേതൃത്വത്തില്‍ കൂടുതല്‍ കാര്യക്ഷമമായി മുന്നോട്ടു പോകുമെന്നാണു പ്രതീക്ഷ. സിഎംഐ സഭയെയും സ്ഥാപനങ്ങളെയും നന്ദിയോടെ അനുസ്മരിച്ച മാര്‍ കരിയില്‍ കൂട്ടായ്മയിലും പ്രാര്‍ഥനയിലും ഒരുമിച്ചു മുന്നേറാന്‍ ഏവരും പരിശ്രമിക്കണമെന്നും ഉത്ബോധിപ്പിച്ചു.

തുടര്‍ന്നു നടന്ന സമ്മേളനത്തില്‍ വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, ബിഷപ് മാര്‍ സെബാസ്റ്റ്യന്‍ എടയന്ത്രത്ത്, സിഎംഐ പ്രിയോര്‍ ജനറാള്‍ റവ. ഡോ. പോള്‍ ആച്ചാണ്ടി, സിഞ്ചല്ലൂസ് റവ. ഡോ. ജോസ് പുതിയേടത്ത്, പ്രസ്ബിറ്ററല്‍ കൗണ്‍സില്‍ സെക്രട്ടറി റവ.ഡോ. കുര്യാക്കോസ് മുണ്ടാടന്‍, എഫ് സിസി പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ അനീറ്റ, പാസ്റ്ററല്‍ കൗണ്‍സില്‍ സെക്രട്ടറി പി.പി. ജരാര്‍ദ്ദ് എന്നിവര്‍ പ്രസംഗിച്ചു.

Leave a Comment

*
*