വര്‍ഗ്ഗീസ് പുതുശ്ശേരി
വിശ്വാസത്തിന്‍ പൊന്‍ പ്രഭ വിതറി
സുവിശേഷത്തിന്‍ ദീപ്തി പരത്താന്‍
ഭാരതമണ്ണില്‍ വന്നൊരു തോമാശ്ലീഹാ –
തന്നുടെ നാമം വാഴ്ത്തിപാടി നമിക്കാം!.
കാടും മേടും കടലും താണ്ടി
പായക്കപ്പലിന്‍ അമരത്തേറി
ഗുരുവിന്‍ സ്നേഹ പതാകയുമേന്തി
തീരമണഞ്ഞു, പുണ്യപുരാതന കൊടുങ്ങല്ലൂരില്‍
പാമ്പും ചേമ്പും തിന്നും നാട്ടില്‍
മന്ത്രം തന്ത്രം – നടമാടും മണ്ണില്‍
വിശ്വാസത്തിന്‍ വിത്ത് വിതയ്ക്കാന്‍
സത്യത്തിന്‍ പൊരുള്‍ തേടി അലഞ്ഞു!
ധീരതയാര്‍ന്നൊരു ചിത്തവുമായി
കൂടോത്രത്തിന്‍ കൂടു പൊളിച്ചു.
തൊട്ടു വിശ്വാസിയാണെന്നാകിലും
ഗുരുവിന്‍ കൂടെ മരിക്കാന്‍ തയ്യാര്‍!
കുന്തം കൊണ്ടിഹ! കുത്തിമുറിച്ചൊരു –
തിരുവക്ഷസ്സില്‍ വിരല്‍ തൊട്ടപ്പോള്‍
അകതാരില്‍ നിന്നുതിര്‍ന്നൊരു ഗദ്ഗദം
ഓ! "എന്‍റെ കര്‍ത്താവേ! എന്‍റെ ദൈവമേ!"
