ലോകമെങ്ങും നിന്ന് എത്തിച്ച വ്യത്യസ്തമായ 100 പുല്ക്കൂടുകള് വത്തിക്കാനില് ഫ്രാന്സിസ് മാര്പാപ്പ ആശീര്വദിച്ചു. വത്തിക്കാനിലെ പ്രദര്ശനത്തില് ആകെ 30 രാജ്യങ്ങളില് നിന്നുള്ള 130 പുല്ക്കൂടുകള് ഉണ്ടായിരുന്നു. മുന്കൂട്ടി പരിപാടിയിടാതെ നടന്ന സന്ദര്ശനമായിരുന്നു പ്രദര്ശനഗരിയിലേയ്ക്കു മാര്പാപ്പയുടേത്. ജീവനുള്ള മൃഗങ്ങളുമായി 1223-ല് വി. ഫ്രാന്സിസ് അസീസി ആദ്യമായി പുല്ക്കൂടു നിര്മ്മിച്ച ഗ്രെച്ചിയോ പട്ടണം കഴിഞ്ഞയാഴ്ച മാര്പാപ്പ സന്ദര്ശിച്ചിരുന്നു. ക്രിസ്മസിനോടനുബന്ധിച്ചു വീടുകളിലും പൊതുസ്ഥലങ്ങളിലുമെല്ലാം പുല്ക്കൂടുകള് നിര്മ്മിക്കുന്ന പാരമ്പര്യം മനോഹരമാണെന്നും അതു തുടരണമെന്നും ആഹ്വാനം ചെയ്യുന്ന ഒരു അപ്പസ്തോലിക ലേഖനം മാര്പാപ്പ അവിടെ വച്ചു പുറപ്പെടുവിക്കുകയും ചെയ്തു.