Latest News
|^| Home -> International -> വി. പത്രോസ് ശ്ലീഹായുടെ തിരുശേഷിപ്പ് മാര്‍പാപ്പ ഓര്‍ത്തഡോക്സ് പാത്രിയര്‍ക്കീസിനു സമ്മാനിച്ചു

വി. പത്രോസ് ശ്ലീഹായുടെ തിരുശേഷിപ്പ് മാര്‍പാപ്പ ഓര്‍ത്തഡോക്സ് പാത്രിയര്‍ക്കീസിനു സമ്മാനിച്ചു

Sathyadeepam

റോമില്‍ സൂക്ഷിച്ചിരുന്നതും വി. പത്രോസിന്‍റേതെന്നു വിശ്വസിക്കപ്പെടുന്നതുമായ തിരുശേഷിപ്പ് ഫ്രാന്‍സിസ് മാര്‍പാപ്പ ഓര്‍ത്തഡോക്സ് പാത്രിയര്‍ക്കീസ് ബര്‍ത്തലോമിയോ ഒന്നാമനു സമ്മാനിച്ചു. സെ. പീറ്റേഴ്സ് ബസിലിക്കയില്‍ 1952 ല്‍ നടത്തിയ ഉത്ഖനന പ്രവര്‍ത്തനങ്ങള്‍ക്കിടെയാണ് എട്ട് അസ്ഥിക്കഷണങ്ങളടങ്ങിയ ഒരു പിച്ചളപേടകം ലഭിച്ചത്. ഇത് പോള്‍ ആറാമന്‍ മാര്‍പാപ്പ പേപ്പല്‍ വസതിയിലെ ചാപ്പലില്‍ പ്രതിഷ്ഠിച്ചു. ജൂണ്‍ 29 നു പത്രോസ്, പൗലോസ് ശ്ലീഹന്മാരുടെ തിരുനാള്‍ ആഘോഷിക്കാന്‍ കോണ്‍സ്റ്റാന്‍റിനോപ്പിള്‍ പാത്രിയര്‍ക്കീസിന്‍റെ പ്രതിനിധിസംഘം പതിവുപോലെ വത്തിക്കാനില്‍ എത്തിയിരുന്നു. ആ സംഘത്തിലെ ഓര്‍ത്തഡോക്സ് ആര്‍ച്ചുബിഷപ് ജോബിനെ മാര്‍പാപ്പ പേപ്പല്‍ വസതിയിലെ ചാപ്പലിലേയ്ക്കു കൂട്ടിക്കൊണ്ടു പോകുകയും തിരുശേഷിപ്പു പേടകം ഒരു സമ്മാനമായി നല്‍കുകയുമായിരുന്നു.

“അപ്പസ്തോലനായ പത്രോസിന്‍റേതെന്നു കരുതപ്പെടുന്ന അസ്ഥികള്‍” എന്നെഴുതിയാണ് പേടകം ചാപ്പലില്‍ സ്ഥാപിച്ചിരുന്നത്. 2013-ല്‍ ക്രിസ്തുവിന്‍റെ രാജത്വതിരുനാള്‍ ദിനത്തില്‍ ഇതു പൊതുവണക്കത്തിനു വച്ചിരുന്നു. അന്ന് കോണ്‍സ്റ്റാന്‍റിനോപ്പിള്‍ പാത്രിയര്‍ക്കീസും അവിടെ സന്നിഹിതനായിരുന്നു. പേടകത്തിലുള്ളത് വി. പത്രോസിന്‍റെ അസ്ഥികളായിരിക്കാന്‍ ഗൗരവാവഹമായ സാദ്ധ്യതയുണ്ടെന്നും അതിനപ്പുറം ഒന്നും പറയാനാവില്ലെന്നും വത്തിക്കാന്‍ വക്താവ് അന്നു വിശദീകരിക്കുകയുണ്ടായി. എഡി 160-ലെ ഒരു ഗ്രീക് ലിഖിതവുമായാണ് 1952-ലെ ഉത്ഖനനത്തില്‍ ഈ പേടകം ലഭ്യമായത്. “പത്രോസ് ഇവിടെയുണ്ട്” എന്നാണ് ആ ലിഖിതത്തിലുണ്ടായിരുന്നത്. 60 നും 70 നും ഇടയ്ക്കു പ്രായമുള്ള ഒരാളുടേതാണ് അസ്ഥികള്‍ എന്നു പരിശോധനയില്‍ കണ്ടെത്തിയിരുന്നു. വി. പത്രോസിന്‍റേതെന്നു ബോദ്ധ്യപ്പെടാവുന്നതാണ് ഈ തിരുശേഷിപ്പുകള്‍ കണ്ടെത്തിയ വിധമെന്നും അങ്ങനെ വിശ്വസിക്കാന്‍ മതിയായ കാരണങ്ങളുണ്ടെന്നും പോള്‍ ആറാമന്‍ മാര്‍പാപ്പ 1968 ല്‍ എഴുതിയിട്ടുണ്ട്.

മാര്‍പാപ്പ സമ്മാനിച്ച തിരുശേഷിപ്പു പേടകവുമായി ഇസ്താംബുളിലേയ്ക്കു പോയ ഓര്‍ത്തഡോക്സ് പ്രതിനിധിസംഘത്തെ വത്തിക്കാന്‍ ക്രൈസ്തവൈക്യകാര്യാലയത്തിലെ അണ്ടര്‍ സെക്രട്ടറിയായ മോണ്‍. ആന്‍ഡ്രിയ പല്‍മീരി അനുഗമിക്കുകയും പേടകം പാത്രിയര്‍ക്കീസ് ബര്‍ത്തലോമിയോയ്ക്കു പേപ്പല്‍ പ്രതിനിധിയെന്ന നിലയില്‍ നേരിട്ടു കൈമാറുകയും ചെയ്തു. സമൂര്‍ത്തമായ സഭൈക്യത്തിലേയ്ക്കുള്ള ഭീമമായ ഒരു ചുവടുവയ്പാണ് ഇതെന്നു ഓര്‍ത്തഡോക്സ് ആര്‍ച്ചുബിഷപ് ജോബ് പ്രസ്താവിച്ചു.

Leave a Comment

*
*