Latest News

Sunday Bible (October 1, 2017)

ഏശ.26:1-11; ഫിലി.4: 4-9; മത്താ. 15: 21- 28

മേശയ്ക്കു മുകളിലും കീഴെയുമല്ല, മറിച്ചു മേശയ്ക്കു ചുറ്റും വിരുന്നൊരുക്കുന്ന യേശുവിനെയാണ് ഇന്നത്തെ സുവിശേഷത്തില്‍ കാണുന്നത്. ‘കര്‍ത്താവേ, നായ്ക്കളും യജമാനന്മാരുടെ മേശയില്‍ നിന്നു വീഴുന്ന അപ്പക്കഷണങ്ങള്‍ തിന്നുന്നുണ്ടല്ലോ” (മത്ത. 15:27). കാനാന്‍കാരി സ്ത്രീയുടെ ഈ മറുപടിയാണു യേശുവിലുള്ള വിശ്വാസത്തിന്‍റെ ആഴം കാണിച്ചുതരുന്നത്. കാനാന്‍കാരി സ്ത്രീയുടെ വിശ്വാസത്തെ വലമതിക്കുന്ന യേശു. ഇസ്രായേല്‍ ജനത്തെ സംബന്ധിച്ചിടത്തോളം കാനാന്‍കാരി വിജാതീയ സ്ത്രീയാണ്. എന്നാല്‍ കാനാന്‍കാരി സ്ത്രീയുടെ ആഗ്രഹം നിറവേറ്റുകയും അവളുടെ പുത്രിയെ സൗഖ്യമുള്ളവളാക്കുകയും ചെയ്ത യേശു – എല്ലാവര്‍ക്കും – യഹൂദര്‍ക്കും വിജാതീയര്‍ക്കും – ഒരുപോലെ വിരുന്നൊരുക്കുന്ന കാഴ്ചയാണു നാം കാണുന്നത്. ആന്തരികവും ബാഹ്യവുമായ വിശുദ്ധിയെക്കുറിച്ചുള്ള ചര്‍ച്ചയ്ക്കുശേഷമാണു മത്തായി സുവിശേഷകന്‍ കാനാന്‍കാരി സ്ത്രീയുടെ വിവരണം നല്കിയിരിക്കുന്നത്. യഹൂദരും വിജാതീയരും ഒരുപോലെ വിശുദ്ധിയിലേക്കു വിളിക്കപ്പെട്ടിരിക്കുന്നു എന്ന് ഇതു സാക്ഷ്യപ്പെടുത്തുന്നു.

പരസ്പരമുള്ള വേര്‍തിരിവുകളും വര്‍ഗീയ-വംശീയ വിദ്വേഷങ്ങളും വര്‍ദ്ധിച്ചുകൊണ്ടിരിക്കുന്ന ഒരു കാലഘട്ടത്തിലാണു നാം ജീവിക്കുന്നത്. ഈ സാഹചര്യത്തില്‍ ഈ സുവിശേഷ ഭാഗം വളരെ പ്രാധാന്യമര്‍ഹിക്കുന്നു. നിരന്തരം, നിര്‍ഭയമുള്ള ഒരു അപേക്ഷയും വിശ്വാസവും കാനാന്‍കാരി സ്ത്രീയില്‍ നമുക്കു കാണാന്‍ സാധിക്കും. ആരും ശ്രദ്ധിക്കുന്നില്ല എന്നുവരികിലും. തന്‍റെ അപേക്ഷ നിര്‍ഭയം യേശുവിനു മുമ്പില്‍ അവതരിപ്പിക്കുന്നു. കാനാന്‍കാരി സ്ത്രീയുടെ വിശ്വാസത്തെ യേശു പരീക്ഷിക്കുന്നുണ്ട്. എന്നാല്‍ യേശു അവളെ അവഗണിക്കുന്നില്ല. ആ പരീക്ഷയില്‍ കാനാന്‍കാരി സ്ത്രീ വിജയിക്കുകയാണു ചെയ്യുന്നത്. അവളുടെ നിരന്തരമായ പ്രാര്‍ത്ഥന, യേശുവിലുള്ള ആഴവും അചഞ്ചലവുമായ വിശ്വാസവും നമുക്കും മാതൃകയാണ്.

ദൈവത്തിന്‍റെ കരുണയെ സൂചിപ്പിക്കുന്ന ‘ഏലയോസ്’ എന്ന ഗ്രീക്ക് വാക്ക് ഇവിടെ കാണാന്‍ സാധിക്കും. ദൈവത്തിന്‍റെ കരുണ എല്ലാവരെയും ഉള്‍ക്കൊള്ളുന്നതാണെന്ന് ഓര്‍മിപ്പിക്കുകയാണിവിടെ. “കരുണയുടെ വാതിലി”നു പക്ഷഭേദമില്ല, തരംതിരിവില്ല. വിജാതീയരെ പുറന്തള്ളപ്പെട്ടരായി കാണുന്ന യഹൂദമനോഭാവം തിരുത്തുകയാണു യേശു ചെയ്യുന്നത്. ഇടുങ്ങിയ ചിന്താഗതികള്‍ തിരുത്തപ്പെടേണ്ടവയാണ്. യേശു ഒരുക്കുന്ന ഊട്ടുമേശയുടെ സമൃദ്ധിയിലേക്ക് എല്ലാവരും ഒരുപോലെ ക്ഷണിക്കപ്പെട്ടിരിക്കുന്നു. ആ ക്ഷണം സ്വീകരിക്കാനും എല്ലാവരെയും ഉള്‍ക്കൊള്ളാനുമുള്ള മനസ്സിന്‍റെ വിശാലതയും ആഴവും സ്വന്തമാക്കാം.

പ്രാര്‍ത്ഥനയ്ക്ക് ഉടന്‍ ഫലം കിട്ടിയില്ലായെങ്കില്‍ ദൈവത്തോടു മറുതലിക്കുന്നവരാണ് അധികം പേരും. ദൈവം നിശ്ശബ്ദനാകുമ്പോള്‍ പ്രാര്‍ത്ഥനയുടെ തീവ്രത കൂടും. കാനാന്‍കാരിയുടെ അപേക്ഷ കേള്‍ക്കാതെ പോകുന്ന യേശു; അവള്‍ കൂടുതല്‍ തീവ്രതയോടെ അപേക്ഷിക്കുന്നു. അവഗണിച്ചുവെന്നു തോന്നുമ്പോള്‍ എളിമയോടെ പ്രാര്‍ത്ഥിക്കണം. നായ്ക്കളോളം താഴാന്‍ തയ്യാറായി യേശുവിന്‍റെ കരുണ യാചിക്കുന്നവള്‍ നാം പ്രാര്‍ത്ഥിക്കുമ്പോള്‍ പാപിയാണെന്നും, അവകാശമല്ല കരുണ തോന്നണമേയെന്ന യാചനയാണു പുലര്‍ത്തേണ്ടത് എന്നും ബോദ്ധ്യപ്പെടുത്തുന്നു.