Latest News

Sunday Bible (November 1, 2017)

ഏശ.6:1-8; 1കോറി.13: 1-13; മത്താ 16: 13- 19

പത്രോസിന്‍റെ വിശ്വാസ പ്രഖ്യാപനവും യേശുവിന്‍റെ മറുപടിയും ഈ സുവിശേഷഭാഗത്തു കാണുന്നു. യേശുവിന്‍റെ വ്യക്തിത്വം വെളിപ്പെടുത്തുകയും രക്ഷാകരചരിത്രത്തില്‍ നിര്‍ണായക പ്രാധാന്യം എടുത്തുപറയുകയും ചെയ്യുകയാണു മത്തായി സുവിശേഷകന്‍. പഴയ നിയമഗ്രന്ഥങ്ങളില്‍ പറയപ്പെടുന്ന പ്രവചനങ്ങളുടെ (2 സാമു. 7,1 ദിനവൃത്ത 17, എശയ്യ 22:22) പൂര്‍ത്തീകരണം നമുക്കിവിടെ ദര്‍ശിക്കാന്‍ സാധിക്കും.

കേസറിയ – ഫിലിപ്പി പ്രദേശത്തു വച്ചാണ് ഈ സംഭവം നടക്കുന്നത്. അതൊരു വിജാതീയ നഗരമായിരുന്നു. ഹെര്‍മോന്‍ മലയുടെ തെക്കേ അടിവശത്തും ഗലീലിതടാകത്തില്‍ നിന്നും വടക്ക് 20 മൈല്‍ ദൂരത്തുമായാണ് ഇതു സ്ഥിതി ചെയ്യുന്നത്. ഇന്നു ബാനിയാസ്’ എന്നറിയപ്പെടുന്ന ഈ സ്ഥലത്തു വിജാതീയ ദേവനായ ‘പാന്‍’-ന്‍റെ പേരില്‍ ഒരു ഗുഹാക്ഷേത്രവും ഉണ്ടായിരുന്നു. അഗസ്റ്റസ് ഭരണാധികാരി ആയിരിക്കുമ്പോള്‍ ബിസി 20-ല്‍ ഹേറോദോസിന് ഈ സ്ഥലം നല്കി. ഹേറോദോസിന്‍റെ മകന്‍ ഫിലിപ്പ്, ഈ പ്രദേശത്തിന്‍റെ ദേശാധിപതിയായപ്പോള്‍ തന്‍റെ പേരിലും അഗസ്റ്റസിന്‍റെ പേരിലും നഗരത്തിന്‍റെ പേരു മാറ്റി. അങ്ങനെയാണു കേസറിയാ ഫിലിപ്പി എന്ന പേരു വരാന്‍ കാരണം. സുവിശേഷഭാഗത്ത് ഉപയോഗിച്ചിരിക്കുന്ന പ്രതീകങ്ങള്‍ (പാറ, കവാടങ്ങള്‍ മുതലായവ) ഈ നഗരത്തിന്‍റെ ഭൂപ്രകൃതിയില്‍ നിന്നും യേശു എടുത്ത് ഉപയോഗിക്കുന്നതായി കാണാം.

യേശു തന്‍റെ ശിഷ്യന്മാരുടെ വിശ്വാസത്തിന്‍റെ ആഴം പരിശോധിക്കുകയാണ് തന്‍റെ ചോദ്യങ്ങളിലൂടെ. പന്ത്രണ്ടു പേരുടെയും പ്രതിനിധിയായി പത്രോസ് ശ്ലീഹാ മറുപടി പറയുന്നു. “നീ ജീവനുള്ള ദൈവത്തിന്‍റെ പുത്രനായ ക്രിസ്തുവാണ്” (16). ക്രിസ്തുവില്‍ മിശിഹാ പ്രതീക്ഷകളുടെ സാക്ഷാത്കാരവും ദാവീദിനോടു ചെയ്ത വാഗ്ദാനങ്ങളുടെ പൂര്‍ത്തീകരണവും രക്ഷാകരചരിത്രത്തിലുള്ള നിര്‍ണായകസ്ഥാനവും വെളിവാക്കപ്പെടുന്നു പത്രോസിന്‍റെ വിശ്വാസപ്രഖ്യാപനത്തിലൂടെ.

യേശു ശിഷ്യന്മാരോടു ചോദ്യം ചോദിക്കുന്ന സമയം വളരെ പ്രധാനപ്പെട്ടതാണ്. ബൈബിള്‍ പണ്ഡിതരുടെ അഭിപ്രായത്തില്‍ യേശുവിന്‍റെ കുരിശുമരണത്തിന് ഏകദേശം 6 മാസം മുമ്പായിരിക്കാം ഈ സംഭവം നടന്നിരിക്കുക. അതായത് 12 ശ്ലീഹന്മാരും ഏകദേശം രണ്ടര വര്‍ഷത്തോളം യേശുവുമായി നിത്യേനയുള്ള സമ്പര്‍ക്കവും യാത്രകളും മൂലം യേശുവിനെക്കുറിച്ചുള്ള പക്വമായ ഒരഭിപ്രായം പറയാന്‍ സമയമായിട്ടുണ്ടായിരുന്നു.

“ആത്മശോധനയില്ലാത്ത ജീവിതം, ഒരു പാഴ്ജീവിതമാണ്”- ഈ ചൊല്ലു നാം കേട്ടിട്ടുണ്ട്. അതുപോലെതന്നെയാണ് ആത്മപരിശോധന ഇല്ലാത്ത വിശ്വാസവും. നാമെല്ലാവരും നമ്മുടെ വിശ്വാസം ജീവിക്കേണ്ടതു ചിലപ്പോള്‍ വിശ്വാസത്തെ എതിര്‍ക്കുന്നവരുടെ ഇടയിലും വിശ്വാസമില്ലാത്തവരുടെ ഇടയിലുമാകാം. ആരാണോ വളരെ വ്യക്തമായും ശക്തമായും തന്‍റെ വിശ്വാസത്തെ മുറുകെപ്പിടിക്കുന്നത് അവര്‍ക്കാണു ധൈര്യത്തോടും സന്തോഷത്തോടുംകൂടി വിശ്വാസം പ്രഘോഷിക്കാന്‍ സാധിക്കൂ.

വിശ്വാസപ്രഖ്യാപനം നടത്തിയ പത്രോസ് ശ്ലീഹായെ “നീ ഭാഗ്യവാന്‍” എന്നു വിളിക്കുന്നുണ്ട്. നമുക്കു ലഭിച്ച അത്ഭുതങ്ങള്‍ ജീവിത സാക്ഷ്യമാക്കുമ്പോള്‍ സഭയെ കെട്ടിപ്പടുക്കുന്ന ശിലകളായി നാം രൂപാന്തരപ്പെടുമ്പോള്‍ നാം ഓരോരുത്തരും ഭാഗ്യവാന്മാരായിത്തീരും.