വത്തിക്കാനിലെ ദേവാലയങ്ങളില്‍ കലാമേന്മകൊണ്ട് ഏറ്റവും പ്രസിദ്ധം സിസ്റ്റൈന്‍ ചാപ്പലാണ്. മാര്‍പാപ്പമാരെ തിരഞ്ഞെടുക്കുന്ന കോണ്‍ക്ലേവ് നടക്കുന്നതുകൊണ്ടും സിസ്റ്റൈന്‍ ചാപ്പല്‍ ലോക പ്രസിദ്ധമാണ്. വത്തിക്കാന്‍ കൊട്ടാരത്തിന്‍റെ ഔദ്യോഗിക ദേവാലയമായ സിസ്റ്റൈന്‍ ചാപ്പലില്‍ വച്ചാണു വത്തിക്കാനിലെ പ്രധാനപ്പെട്ട തിരുക്കര്‍മങ്ങള്‍ നടക്കുന്നത്. സിക്സതൂസ് നാലാമന്‍ (1471-1481) മാര്‍പാപ്പയുടെ കാലഘട്ടത്തില്‍ 1473-നും 1481-നും ഇടയിലാണ് ഈ ദേവാലയം നിര്‍മിച്ചത്. 133 അടി നീളവും 46 അടി വീതിയുമു ള്ള ഈ ചാപ്പലിന്‍റെ മുകളിലാണു മൈക്കലാഞ്ചലോയുടെ ലോകപ്രശസ്തമായ അന്ത്യവിധി എന്ന ചിത്രം. സിസ്റ്റൈന്‍ ചാപ്പലിന്‍റെ എല്ലാ ചുമരുകളും നവോത്ഥാന കാലഘട്ടത്തിലെ കലാമേന്മ വിളിച്ചോതുന്നവയാണ്. അന്ത്യവിധിയെക്കുറിച്ചുള്ള ചിത്രം നാലു വര്‍ഷംകൊണ്ടാണു മൈക്കലാഞ്ചലോ വരച്ചുതീര്‍ത്തത്. 1508 മുതല്‍ 1512 വരെയുള്ള കാലഘട്ടത്തിലാണു മൈക്കലാഞ്ചലോ ഈ ചിത്രരചന നടത്തിയത്. വി. ഗ്രന്ഥത്തിലെ സൃഷ്ടിവിവരണം ആസ്പദമാക്കി വരച്ച ഒമ്പതു ചിത്രങ്ങളില്‍ ദൈവം മനുഷ്യനെ സൃഷ്ടിക്കുന്ന ചിത്രം ലോകപ്രശസ്തമാണ്. മൈക്കലാഞ്ചലോയെ കൂടാതെ നവോത്ഥാന കാലഘട്ടത്തിലെ ലോകപ്രശസ്ത ചിത്രകാരന്മാരായ പെറുജീനോ, ബൊത്തിച്ചല്ലി, റെസ്സെല്ലി, സിഞ്ഞൊറെല്ലി, ജിര്‍ളാന്തോ, സാല്‍വയാത്തി എന്നിവരുടെ ചിത്രങ്ങളും സിസ്റ്റൈന്‍ ചാപ്പലിലുണ്ട്.
