2019 ഒടുവിലും 2021-ലും ഫ്രാന്‍സിസ് മാര്‍പാപ്പ രണ്ട് ഏഷ്യന്‍ പര്യടനങ്ങള്‍ നടത്താന്‍ ഒരുങ്ങുന്നതായി റിപ്പോര്‍ട്ട്. ഈ വര്‍ഷം നവംബറില്‍ തായ്ലന്‍ഡിലേയ്ക്കും ജപ്പാനിലേയ്ക്കും മാര്‍പാപ്പ സന്ദര്‍ശനത്തിനെത്തുമെന്നാണ് വാര്‍ത്ത. വത്തിക്കാന്‍ ഇതു സ്ഥിരീകരിച്ചിട്ടില്ല. ജനസംഖ്യയില്‍ 0.5 ശതമാനം മാത്രം കത്തോലിക്കരുള്ള രാജ്യങ്ങളാണ് തായ് ലന്‍ഡും ജപ്പാനും. 2021-ല്‍ ഫിലിപ്പൈന്‍സ് സന്ദര്‍ശിക്കാനും മാര്‍പാപ്പയ്ക്കു ക്ഷണമുണ്ട്.
ബ്രസീല്‍ കഴിഞ്ഞാല്‍ ലോകത്തില്‍ ഏറ്റവുമധികം കത്തോലിക്കരുള്ള രാജ്യമാണു ഫിലിപ്പൈന്‍സ്. 2015-ല്‍ ഫ്രാന്‍സിസ് മാര്‍പാപ്പ ഫിലിപ്പൈന്‍സ് സന്ദര്‍ശിച്ചിരുന്നു. പാപ്പാമാരുടെ ചരിത്രത്തിലെ തന്നെ ഏറ്റവും വലിയ ജനാവലിയാണ് ആ സന്ദര്‍ശനത്തിന്‍റെ സമാപന ദിവ്യബലിക്കെത്തിയത്. ഏതാ ണ്ട് 60 ലക്ഷം പേര്‍.
ജപ്പാനിലേയ്ക്കുള്ള യാത്ര തീര്‍ച്ചയാക്കപ്പെട്ടിട്ടുണ്ടെന്നും കൃത്യം തീയതികള്‍ തീരുമാനിച്ചിട്ടില്ലെന്നും വത്തിക്കാന്‍ വക്താവ് ഈ റിപ്പോര്‍ട്ടുകളോടു പ്രതികരിച്ചു. തായ്ലന്‍ഡ്, ഫിലിപ്പൈന്‍സ് യാത്രകളുടെ കാര്യത്തില്‍ തീരുമാനമായിട്ടില്ലെന്നും അദ്ദേഹം പറഞ്ഞു. അടുത്ത മാസം മാര്‍പാപ്പ ആഫ്രിക്കന്‍ രാജ്യമായ മൊസാംബിക് സന്ദര്‍ശിക്കുന്നുണ്ടെന്നും അതിനുള്ള ഒരുക്കങ്ങളാണ് ഇപ്പോള്‍ നടക്കുന്നതെന്നും അദ്ദേഹം വ്യക്തമാക്കി.
