20-ാം നൂറ്റാണ്ടിന്‍റെ മദ്ധ്യത്തില്‍ റുമേനിയായിലെ കമ്മ്യൂണിസ്റ്റ് ഭരണത്തിനു കീഴില്‍ കൊല്ലപ്പെട്ട ഗ്രീക്ക് കത്തോലിക്കാ സഭയിലെ 7 മെത്രാന്മാരുടെ രക്തസാക്ഷിത്വം ഫ്രാന്‍സിസ് മാര്‍പാപ്പ ഔദ്യോഗികമായി അംഗീകരിച്ചു. ഇതോടെ ഇവരെ വിശുദ്ധരായി പ്രഖ്യാപിക്കുന്നതിനു വഴിതെളിഞ്ഞു. ബിഷപ്പുമാരായ വലേരിയു ഫ്രെന്‍റിയു, വാസിലെ ആഫ്റ്റെനി, ലോവാന്‍ സുച്ചിയു, ടിറ്റോ ലിവിയോ, ലോവാന്‍ബലന്‍, അലെക്സാണ്ട്രു റുസു, ലുലിയു ഹോസു എന്നിവരാണ് 1950-നും 70-നും ഇടയില്‍ റുമേനിയായിലെ സോവ്യറ്റ് അധിനിവേശനത്തിനിടയില്‍ കൊല്ലപ്പെട്ടത്. ജയിലുകളിലും ക്യാമ്പുകളിലും തടവില്‍ കഴിയുകയായിരുന്ന അവര്‍ ഏകാന്തതയും ശൈത്യവും വിശപ്പും രോഗവും കഠിനജോലികളും മൂലം കൊല്ലപ്പെടുകയായിരുന്നു. ഇവരില്‍ ബിഷപ് ഹോസു മരണത്തിന് ഒരു വര്‍ഷം മുമ്പ് കാര്‍ഡിനലായി ഉയര്‍ത്തപ്പെട്ടിരുന്നു.
