കാത്തലിക് റിലീഫ് സര്‍വീസസ് എന്ന കത്തോലിക്കാ ജീവകാരുണ്യസംഘടനയുടെ രണ്ടു പ്രവര്‍ത്തകര്‍ എത്യോപ്യയില്‍ കൊല്ലപ്പെട്ടു. അഡിസ് അബാബയില്‍ ഒരു ദൗത്യനിര്‍വഹണത്തിനുശേഷം വാഹനത്തില്‍ മടങ്ങുമ്പോഴായിരുന്നു അക്രമം. അമേരിക്കന്‍ കത്തോലിക്കാ മെത്രാന്‍ സംഘത്തിന്റെ നേതൃത്വത്തിലുള്ള സി ആര്‍ എസ്, നൂറോളം രാജ്യങ്ങളില്‍ സേവനം ചെയ്യുന്നുണ്ട്. അക്രമത്തിന്റെ വിശദാംശങ്ങള്‍ അറിവായിട്ടില്ല. ഫെഡറല്‍ സര്‍ക്കാരിനെതിരെ നിരവധി സമരങ്ങള്‍ എത്യോപ്യയില്‍ അരങ്ങേറുന്നുണ്ട്. പലതും രൂക്ഷമായ അക്രമസമരങ്ങളാണ്. എത്യോപ്യയുടെ 11 മേഖലാ പൊലീസ് വിഭാഗങ്ങളെ പിരിച്ചുവിട്ട് കേന്ദ്രസേന രൂപീകരിക്കാനുള്ള തീരുമാനത്തോടാണ് ശക്തമായ എതിര്‍പ്പുള്ളത്. ഈ തീരുമാനം വലിയ അരക്ഷിതാവസ്ഥ സൃഷ്ടിക്കുമെന്ന് വിമര്‍ശകര്‍ പറയുന്നു.
