![കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് തെള്ളകം ചൈതന്യയില് സംഘടിപ്പിച്ച ആരോഗ്യദിനാചരണത്തിന്റെ ഉദ്ഘാടനം അതിരമ്പുഴ ഗ്രാമപഞ്ചായത്ത് പ്രസിഡന്റ് ജോസ് ജോസഫ് അമ്പലക്കുളം നിര്വ്വഹിക്കുന്നു. (ഇടത്തുനിന്ന്) മിനി ഫിലിപ്പ്, സിസ്റ്റര് ഡോ. ലത എസ്.വി.എം, ലൗലി ജോര്ജ്ജ്, ഫാ. സുനില് പെരുമാനൂര്, ലിജോ സാജു എന്നിവര് സമീപം.](http://media.assettype.com/sathyadeepam%2F2024-04%2F64ee681f-ecbd-403c-90fb-d230003f76e6%2Fksss_health_day_celebrated.jpg?w=480&auto=format%2Ccompress&fit=max)
കോട്ടയം: ലോക ആരോഗ്യദിനത്തോടനുബന്ധിച്ച് ആരോഗ്യ സംരക്ഷണ സന്ദേശം എല്ലാവരിലും എത്തിക്കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് ആരോഗ്യദിനാചരണം സംഘടിപ്പിച്ചു. തെള്ളകം ചൈതന്യയില് സംഘടിപ്പിച്ച ദിനാചരണത്തിന്റെ ഉദ്ഘാടനം അതിരമ്പുഴ ഗ്രാമപഞ്ചായത്ത് പ്രസിഡന്റ് ജോസ് ജോസഫ് അമ്പലക്കുളം നിര്വ്വഹിച്ചു. ഏറ്റുമാനൂര് മുനിസിപ്പല് ചെയര്പേഴ്സണ് ലൗലി ജോര്ജ്ജ് ചടങ്ങില് അദ്ധ്യക്ഷത വഹിച്ചു. കെ.എസ്.എസ്.എസ് എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര്, പ്രോഗ്രാം ഓഫീസര് സിജോ തോമസ് എന്നിവര് പ്രസംഗിച്ചു. ദിനാചരണത്തോടനുബന്ധിച്ച് ആരോഗ്യസംരക്ഷണം ഇന്നിന്റെ ആവശ്യകത എന്ന വിഷയത്തില് കിടങ്ങൂര് ലിറ്റില് ലൂര്ദ്ദ് ഹോസ്പിറ്റലിലെ സിസ്റ്റര് ഡോ. ലത എസ്.വി.എം സെമിനാര് നയിച്ചു. കെ.എസ്.എസ്.എസ് സ്വാശ്രയസംഘ പ്രതിനിധികള് ദിനാചരണത്തില് പങ്കെടുത്തു.