![കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് ഭിന്നശേഷിയുള്ള വ്യക്തികളുള്ള കുടുംബങ്ങള്ക്കായി ലഭ്യമാക്കുന്ന തയ്യല് മെഷീന് യൂണിറ്റുകളുടെ വിതരണോദ്ഘാടനം കോട്ടയം മുനിസിപ്പല് ചെയര് പേഴ്സണ് ബിന്സി സെബാസ്റ്റ്യന് നിര്വ്വഹിക്കുന്നു. (ഇടത്തുനിന്ന്) ഫാ. സിജോ ആല്പ്പാറയില്, ഫാ. സുനില് പെരുമാനൂര്, സിത്താര പി.എസ്, ബബിത റ്റി. ജെസ്സില്, സജി ജേക്കബ് എന്നിവര് സമീപം.](http://media.assettype.com/sathyadeepam%2F2023-04%2F4ac9dc14-1da0-4cfc-9377-3a472b4e08b4%2Ftailoring_mechine_dist.jpg?w=480&auto=format%2Ccompress&fit=max)
കോട്ടയം: സ്വയം തൊഴില് സംരംഭകത്വ പദ്ധതികളിലൂടെ സ്വയം പര്യാപ്തതയ്ക്ക് അവസരം ഒരുക്കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് ഭിന്നശേഷിയുള്ള വ്യക്തികളുടെ കുടുംബങ്ങള്ക്കായി തയ്യല് മെഷീന് യൂണിറ്റുകള് വിതരണം ചെയ്തു. കാത്തലിക് ഹെല്ത്ത് അസോസിയേഷന് ഓഫ് ഇന്ഡ്യയുടെ സഹകരണത്തോടെ ലഭ്യമാക്കിയ തയ്യല് മെഷീന് യൂണിറ്റുകളുടെ വിതരണോദ്ഘാടനം തെള്ളകം ചൈതന്യയില് കോട്ടയം മുനിസിപ്പല് ചെയര് പേഴ്സണ് ബിന്സി സെബാസ്റ്റ്യന് നിര്വ്വഹിച്ചു. കെ.എസ്.എസ്.എസ് എക്സിക്യുട്ടീവ് ഡയറക്ടര് ഫാ. സുനില് പെരുമാനൂര് ചടങ്ങില് അദ്ധ്യക്ഷത വഹിച്ചു, കെ.എസ്.എസ്.എസ് അസി. ഡയറക്ടര് ഫാ. സിജോ ആല്പ്പാറയില്, പ്രോഗ്രാം കോര്ഡിനേറ്റര് ബബിത റ്റി ജെസ്സില്, സിബിആര് സന്നദ്ധ പ്രവര്ത്തക സജി ജേക്കബ് എന്നിവര് ചടങ്ങില് സന്നിഹിതരായിരുന്നു. ഭിന്നശേഷിയുള്ളവരുടെ സമഗ്ര ഉന്നമനം ലക്ഷ്യമാക്കി കെ.എസ്.എസ്.എസ് നടപ്പിലാക്കി വരുന്ന സമൂഹാധിഷ്ഠിത പുനരധിവാസ പദ്ധതി സില്വര് ജൂബിലി ആഘോഷങ്ങളുടെ ഭാഗമായിട്ടാണ് ഉഷാ കമ്പനിയുടെ മോട്ടറോടുകൂടിയ തയ്യല് മെഷീന് യൂണിറ്റുകള് ലഭ്യമാക്കിയത്.