![ക്രിസ്ത്വാര്ത്ഥം](http://media.assettype.com/sathyadeepam%2F2023-12%2F167edcfc-21ba-4146-b337-02e7c359d681%2Fkristuartham.jpg?w=480&auto=format%2Ccompress&fit=max)
പുല്ക്കൂടെത്ര ഒരുക്കിയാലും
നക്ഷത്രമെത്ര തെളിച്ചാലും
ഹൃദയത്തില് ഉണ്ണിപിറവിയില്ലായെങ്കില്
വ്യര്ത്ഥം, നിരര്ത്ഥം നിന്റെ ക്രിസ്തുമസ്
ക്രിസ്ത്വാര്ത്ഥമറിയാത്ത നിന്റെ ക്രിസ്തുമസ്.
തന്റെ ദാസിയുടെ താഴ്മയെ അവിടുന്ന് കടാക്ഷിച്ചു.
അടയാളമില്ലാതെ ആകാശദൂതുമായ്
ഒരു ദൈവദൂതനണഞ്ഞനേരം
എളിമതന് തെളിമയാം ഹൃദയം കൊണ്ടന്ന്
കന്യകാമറിയം പുല്ക്കൂട് കൂട്ടി
അനുസരണത്തിന്റെ, ആത്മാര്പ്പണത്തിന്റെ
ലോകത്തെയാദ്യത്തെ പുല്ക്കൂടായമ്മ
എളിമയെ പുല്കിയാ അമ്മപുല്ക്കൂട്ടില്
ദരിദ്രനായ് ദാവീദിന് സൂനു പിറന്നു.
- ക്രിസ്ത്വാര്ത്ഥം ഇതിലുണ്ട് കൂട്ടുകാരാ...
പരമാര്ത്ഥ ഹൃദയര് ദൈവത്തെ കാണും.
അടയാളമായൊരത്ഭുത താരം
ജ്ഞാനികള്ക്കായ് മിഴിതുറന്നെങ്കിലും
രക്ഷകദര്ശന സൗഭാഗ്യമാദ്യം
നിസ്സാരന്മാരാകും ഇടയര്ക്കല്ലേ?
പറുദീസാപുത്രനെ, പരിഹാരപുത്രനെ
ആദ്യം കണ്ടുവണങ്ങിയതിടയരല്ലേ?
കാണിക്കയൊന്നും കൈകളില്ലാത്ത
പച്ചപരമാര്ത്ഥ ഹൃദയരല്ലേ?
ക്രിസ്ത്വാര്ത്ഥം ഇതിലുണ്ട് കൂട്ടുകാരാ...